مِدْ إيك
خلّى بالك ، خلى بالك
أوعى تنسى ، أوعى تأسى
أو تقول مالى ومالك
هِيَّا دنيا ودايرة بينا
يوم معانا ... يوم علينا
يوم تقرب يوم بتبعد
بس يلاّ مد إيدك
حطها مرة فى ايدينا
***
مد إيدك : وانتوا مالكم
دى حياتى وعشتها
واللى عرفته
كان أبويا عارفه قبلها
***
خلى بالك :
ليه بتنسى ليه بأتسى
ليه بتغفل أو تقول مالى ومالك
دَ احنا تحت الشمس أمة
واحنا ويا الفرح لمة
والقلوب بالحب ديمًا مفتوحلك
بس يلا مد ايدك
حطها مرة فى ايدينا
مدها والدنيا تخضر فى عنينا
***
بيقولولى مد ايدك
آل هنشحت حظنا
هو مد الايد يا ناس عمره هيبنى عشنا
ابعدوا يلا اتركونا فى همنا
مالكم ومالنا
دَ نصيبنا وحظنا
***
محنا قلنا : خلى بالك
ليه بتنسى ليه بتاسى ليه تقول مالى ومالك
غابة الاوهام يبددها ضياء الخير
جنة الاحلام ولو طال الاسى والليل
نورها باين فى السما هالل علينا
بس يلا مد ايد حطها مرة فى ايدينا
***
مد ايدك : انتوا برده مصممين
ادى ايديا
بس خايف لتسيبونى والشقى يكتر عليا
لأ سيبونى سيبوا ايديا
دى حياتى وعشتها بهمى وشجونى
***
برده خايف برده ناسى
ليه بتنسى ليه بتأسى
ليه تقول : مالك ومالى
دا المصير جو السفينة دَ مصيرنا كلنا
والأمل ويا المحاولة لحن يرفع شأننا
واوعى تنسى واوعى تأسى أو تقول مالك ومالى
مد أيدك حطها مرة فى ايدينا
واوعى يأسك يقتلك
مد ايدك تصبح الدنيا هَنا يطرح علينا
مد ايدك دى حياتنا كلنا
ربيع المهدى
